საუდის არაბეთმა რეალს და ვინისიუსს ისტორიაში ყველაზე დიდი ტრანსფერი შესთავაზა

ესპანური გამოცემა Marca-ს ინფორმაციით, საუდის არაბეთის კლუბმა ალ აჰლიმ მადრიდის რეალს ისტორიაში ყველაზე ძვირადღირებული გარიგება შესთავაზა.

კერძოდ, მადრიდულ კლუბს საუდელები სოლიდურ თანხას სთავაზობდნენ, ბრაზილიელი შემტევი ვინისიუს ჯუნიორი კი 5-წლიანი კონტრაქტის განმავლობაში 1 მილიარდ ევროს დაეუფლებოდა.

თუმცა, რეალმაც და თავად ვინისიუსმაც ეს შემოთავაზება უარით გაისტუმრეს.

როგორც ზემოთხსენებული წყარო წერს, ვინისიუსი რეალში ბედნიერია და კლუბის დატოვებაზე არ ფიქრობს - ბრაზილიელის მთავარი ოცნებაა, რეალის ფეხბურთელის რანგში ოქროს ბურთი მოიგოს.

სხვათაშორის, ბუკმეიკერების აზრით, 2023/24 სეზონის ოქროს ბურთის მოგების მთავარი ფავორიტიც სწორედ ბრაზილიელი სუპერვარსკვლავია. გამარჯვებული 17 ოქტომბერს გამოვლინდება.