რაფა ნადალი ოლიმპიადიდან მოიხსნება?!

ჯერჯერობით არ არის გადაწყვეტილი, ითამაშებს თუ არა რაფა ნადალი 2024 წლის ოლიმპიურ თამაშებში.

ჩოგბურთის ოლიმპიური თამაშები ხვალ იწყება, თუმცა ნადალმა ორი დღის წინ ვარჯიშზე დისკომფორტი იგრძნო და ბოლო ორი ვარჯიში სრული დატვირთვით ვერ ჩაატარა.

ესპანელის მწვრთნელმა, კარლოს მოიამ პრესას ვერ დაუდასტურა, რომ ნადალი აუცილებლად ითამაშებს: "ვერ მოგცემთ გარანტიას, რომ რაფა ოლიმპიადაზე იასპარეზებს."

დღეს ნადალმა გადახვეული ფეხით, კარლოს ალკარასთან წყვილში ივარჯიშა, რომელთან ერთადაც ის ოლიმპიადაზე აპირებს გამოსვლას.

არსებობს შანსი, რომ რაფა ერთეულთა თანრიგიდან მოიხსნას, მაგრამ ალკარასთან წყვილში ოლიმპიადაზე მონაწილეობა მაინც მიიღოს.

თუ ნადალი ერთეულებშიც ითამაშებს და პირველი წრის მატჩს მოიგებს, დიდი ალბათობით, მეორე ტურში მისი მეტოქე ნოვაკ ჯოკოვიჩი იქნება.