კვარაცხელია ქეცბაიას გაუთანაბრდა

ჩეხეთთან გატანილი გოლი ხვიჩა კვარაცხელიასთვის ეროვნული ნაკრების მაისურით მე-17 აღმოჩნდა. ამ შედეგით ხვიჩა თემურ ქეცბაიას გაუთანაბრდა და ეროვნული გუნდის ყველა დროის ბომბარდირთა დავაში მე-2 ადგილს სწორედ მასთან ერთად იყოფს. 

სიის ერთპიროვნული ლიდერი შოთა არველაძეა 26 გოლით, რომლის შედეგის გამეორებამდეც კვარაცხელიას 9 გოლი აკლია.

ჩეხეთთან გატანილი გოლი გიორგი მიქაუტაძისთვის ნაკრებში უკვე მე-14 იყო, მას მხოლოდ 1 გოლი აკლია მეოთხეადგილოსან ალექსანდრე იაშვილთან.

ბომბარდირთა ათეულს მიუახლოვდა გიორგი ჩაკვეტაძე, რომელმაც ეროვნულ გუნდში მე-9 გოლი გაიტანა, ათეულს ჯაბა კანკავა ხურავს 10 გოლით.

ჩეხეთთან თავური დარტყმა ნაკრებში სადებიუტო გოლი იყო გიორგი ქოჩორაშვილისთვის.

საქართველოს ნაკრებმა ჩეხეთი 4-1 დაამარცხა და ერთა ლიგის ახალი გათამაშება ბრწყინვალე გამარჯვებით დაიწყო.