35-მატჩიანი სერია შეწყდა! ლევერკუზენი ბუნდესლიგაში 2:0-დან დამარცხდა

ბუნდესლიგის მე-2 ტურში მოქმედმა ჩემპიონმა ლევერკუზენის ბაიერმა მოულოდნელი მარცხი იწვნია.

ჩაბი ალონსოს გუნდმა ბაი არენაზე ლაიფციგს უმასპინძლა და 45-ე წუთისთვის დამაჯერებლად 2:0-ს, ფრიმპონგის და გრიმალდოს გოლებით იგებდა.

თუმცა, ტაიმის მიწურულს კამპლმა ერთი ბურთი გაქვითა, 57-ზე ლუის ოპენდამ წონასწორობა აღადგინა, 80-ზე კი ბელგიელმა დუბლი შეასრულა და თავის გუნდს 0:2-დან მატჩი 3:2 მოაგებინა.

ლევერკუზენისთვის ეს 2023 წლის მაისის შემდეგ ბუნდესლიგაში პირველი მარცხია - წინა სეზონში გუნდი ჩემპიონი დაუმარცხებლად გახდა.

ალონსოს გუნდის წაუგებელმა სერიამ ბუნდესლიგაში 35 მატჩი შეადგინა.